សិស្សសាលា២នាក់ជិះម៉ូតូបុកគល់ស្វាយ ស្លាប់ម្នាក់ និងរបួសធ្ងន់ម្នាក់
30-May-2016 | ដោយ មែន កំសត់
ខេត្តសៀមរាប ៖ សិស្សសាលា២នាក់បានជិះម៉ូតូទៅសាលារៀនក្នុងល្បឿនលឿន មិនបានប្រយ័ត្ន ដល់ផ្លូវកោងក៏ជ្រុលចង្កូតទៅបុកគល់ស្វាយ បណ្តាលឱ្យស្លាប់ម្នាក់នៅនឹងកន្លែង និងម្នាក់ទៀតរងរបួសធ្ងន់ បាក់ភ្លៅបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ។ ហេតុការណ៍គ្រោះថ្នាក់ចរាចរដោយខ្លួនឯងនេះកើតឡើងកាលពីវេលាម៉ោង៣និង ៤៥នាទីរសៀល ថ្ងៃទី២៨ ខែឧសភា ឆ្នាំ២០១៦ ស្ថិតនៅចំណុចផ្លូវលំដីស ក្នុងភូមិទឹកថ្លា ឃុំខ្នាត ស្រុកពួក ខេត្តសៀមរាប។
តាមសាក្សីនៅកន្លែងកើតហេតុបានប្រាប់ថា ករណីក្មេងស្រី០២នាក់ជិះម៉ូតូគ្នា មិនបានប្រយ័ត្ន មកដល់ចំណុចផ្លូវកោង ជ្រុលចង្កូតទៅបុកគល់ស្វាយ បណ្ដាលឱ្យអ្នកបើកបរម៉ូតូស្លាប់នៅនឹងកន្លែង និងអ្នករួមដំណើរម្នាក់ទៀតរងរបួសធ្ងន់ ដោយបាក់ភ្លៅខាងឆ្វេង ដែលជិះម៉ូតូ ម៉ាកស្កុបពី ពណ៌ស ផលិតនៅឆ្នាំ២០១៣ ពាក់ស្លាកលេខសៀមរាប 1T-9645 បានធ្វើដំណើរក្នុងទិសដៅពីត្បូងទៅជើង ។ លោកវរសេនីយ៍ត្រី ទេព ពុំសែន អធិការនគរបាលស្រុកពួកបានឱ្យដឹងនៅរសៀលថ្ងៃទី២៩ ខែឧសភា ឆ្នាំ២០១៦នេះថា ជនរងគ្រោះបើកបរម៉ូតូពីទិសខាងត្បូង ទៅទិសខាងជើង លុះដល់ចំណុចកើតហេតុបានជ្រុលចង្កូតទៅបុកគល់ស្វាយ បណ្ដាលឱ្យស្លាប់ម្នាក់ និងម្នាក់ទៀតរងរបួសធ្ងន់។
លោកអធិការនគរបាលស្រុកបានបន្តថា ជនរងគ្រោះទាំង២នាក់មានឈ្មោះ ផន ស្រីណយ អាយុ១៧ឆ្នាំ មុខរបរសិស្ស ជាអ្នកបើកម៉ូតូ(ស្លាប់)និងអ្នករួមដំណើរបាក់ភ្លៅម្នាក់ទៀត មានឈ្មោះ រិន ដានី អាយុ១៤ឆ្នាំ មុខរបរជាសិស្ស អ្នកទាំង២នាក់រស់នៅ ភូមិគោកថ្មី ឃុំពួក ស្រុកពួក ខេត្តសៀមរាប។ បច្ចុប្បន្ន សពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារមកទទួលយក ទៅធ្វើបុណ្យតាមប្រពៃណី រីឯអ្នករងរបួសបាក់ភ្លៅត្រូវបានដឹកយកទៅជួយសង្គ្រោះនៅ មន្ទីរពេទ្យភ្លាមៗផងដែរ ចំណែកម៉ូតូប្រគល់ឱ្យឪពុកម្តាយជនរងគ្រោះដែលស្លាប់៕
ចំនួនអ្នកទស្សនា
- ថ្ងៃនេះ13961
- ម្សិលមិញ20231
- សប្តាហ៍នេះ93041
- ខែនេះ114921
- ឆ្នាំនេះ114921
- សរុប20557377